அரை நொடி வாழ்க்கை

உன் கண்கள் என் கண்களை

சந்திக்கும் அந்த அரைநொடியில்

சொல்லிவிடுகிறது - ஆயிரம்

அர்த்தங்களை, செய்திகளை!

-யார் சொன்னது, கூகுள் தான் வேகமானதென்று?

மிகச்சொற்ப நேரம்தான்

நானுன்னைப் பார்ப்பது - ஆறு

மணிநேரமாய் அலைபேசியில் கேட்டுப்

புரியாததையும் எனக்கு புரியவைத்துவிடுகிறது

அந்த அரைநொடிப் பார்வை.

"பார்க்கமாட்டேன் போ" என்று சொல்லும் கண்கள்,

ஒருதடவையேனும் என்னைப் பார்த்துவிடுகிறது

நான் பார்க்கிறேனா என்று பார்க்க!

-இவ்வரிகள் நம் இருவருக்கும் பொதுவானது.

உன் பார்வை கிடைப்பதற்கு

நாள்முழுதும் காத்துக்கிடக்கும் நான்,

அச்சொற்ப சந்திப்பின் அரைநொடியில் 

முழுவதுமாய் காத்துக்கிடக்கும் உலகம்,

நமக்காக!

இப்படி அரைநொடியில்
எனக்கு ஒரு புதுவாழ்க்கை
பிறந்தும் இறந்தும்விடுகிறது.
இந்த அரைநொடி வாழ்க்கைக்காக
தினமும் வாழ்ந்து ஒழிகிறேன்.